കളിക്കളത്തില്‍ സഹതാരങ്ങളോടുള്ള രോഹിത് ശര്‍മയുടെ പെരുമാറ്റം പലപ്പോഴും ശ്രദ്ധേയമാകാറുണ്ട്. താരത്തിന്റെ പല കമന്റുകളും ആരാധകരിലും സഹതാരങ്ങളിലും ചിരിപടര്‍ത്താറുമുണ്ട്.
താരത്തിന്റെ സ്റ്റംപ് മൈക്ക് കമന്റുകള്‍ പ്രശസ്തവുമാണ്. എന്നിരുന്നാലും രോഹിത് ശര്‍മയെ പൊട്ടിച്ചിരിപ്പിക്കുന്ന ഒരു താരമുണ്ട്. ഇന്ത്യന്‍ വിക്കറ്റ് കീപ്പറും ഐപിഎല്ലില്‍ ഡല്‍ഹി ക്യാപിറ്റല്‍സിന്റെ താരവുമായ റിഷഭ് പന്താണ് ആ താരം.
ഋഷഭ് പന്ത് സമീപത്തുള്ളപ്പോള്‍ തനിക്ക് ചിരി നിയന്ത്രിക്കാന്‍ പ്രയാസമാണെന്ന് രോഹിത് തന്നെയാണ് വെളിപ്പെടുത്തിയത്.
ഇന്ത്യന്‍ ടീമില്‍ എന്നെ ചിരിപ്പിക്കുന്ന ഒരേയൊരു വ്യക്തി റിഷഭാണ്. അവന്‍ വലിയ തമാശക്കാരനാണ്. സ്റ്റമ്പുകള്‍ക്ക് പിന്നിലെ അദ്ദേഹത്തിന്റെ അഭിപ്രായങ്ങള്‍ യഥാര്‍ത്ഥത്തില്‍ രസകരമാണ്.
കാര്യങ്ങള്‍ പറയുന്നതില്‍ അദ്ദേഹത്തിന് തന്റേതായ ശൈലിയുണ്ട്. അവന്‍ പറയുന്നതെല്ലാം കേള്‍ക്കുമ്പോള്‍ എനിക്ക് ചിരി നിയന്ത്രിക്കാന്‍ കഴിയുന്നില്ല.
ഞാന്‍ ചിരിക്കാന്‍ ആഗ്രഹിക്കുമ്പോഴെല്ലാം അവനെ വിളിച്ച് ഒരു നല്ല ചിരി പങ്കിടും. വാഹാനാപകടത്തെത്തുടര്‍ന്ന് ഒരു വര്‍ഷത്തിലേറെയായി അവന്‍ ക്രിക്കറ്റ് നഷ്ടമായപ്പോള്‍ ഞാന്‍ ശരിക്കും നിരാശനായിരുന്നു.
അവന്‍ വീണ്ടും കളത്തിലിറങ്ങിയതില്‍ സന്തോഷമുണ്ട്. അദ്ദേഹം കളിക്കളത്തില്‍ നിന്ന് പുറത്തായപ്പോഴും തമാശ നിറഞ്ഞ അഭിപ്രായങ്ങള്‍ പറയുമായിരുന്നു. രോഹിത് പറയുന്നു.
2022 ഡിസംബറില്‍ ഉണ്ടായ വാഹനാപകടത്തെത്തുടര്‍ന്ന് ഏറെക്കാലും കളത്തിനു പുറത്തായിരുന്ന റിഷഭ് പന്ത് ഈ ഐപിഎല്ലിലൂടെയാണ് മത്സരക്രിക്കറ്റിലേക്ക് തിരികെയെത്തിയത്. സീസണില്‍ വിക്കറ്റ് കീപ്പറായും ബാറ്ററായും ഡല്‍ഹിയ്ക്ക് നിര്‍ണായക സംഭാവനകള്‍ നല്‍കാനും താരത്തിനായി. പോയിന്റ് പട്ടികയില്‍ ആറാമതാണ് ഡല്‍ഹി.
