എടികെ മോഹന് ബഗാനെതിരായ പോരാട്ടത്തില് കേരള ബ്ലാസ്റ്റേഴ്സിന്റെ കെപി രാഹുല് ചുവപ്പുകാര്ഡ് വാങ്ങി പുറത്ത്. കളിയുടെ 64 മത്തെ മിനിറ്റില് എടികെയുടെ മലയാളിതാരം ആഷിഖ് കുരുണിയനെ അപകടകരമായി ഫൗള് ചെയ്തതിനാണ് രാഹുലിന് രണ്ടാം മഞ്ഞക്കാര്ഡും അതുവഴി ചുവപ്പുകാര്ഡും വാങ്ങിയത്.
ഈ കാര്ഡോടെ അടുത്ത മല്സരത്തിലും രാഹുലിന് പുറത്തിരിക്കേണ്ടി വരും. ഹൈദരാബാദിനെതിരേ സ്വന്തം തട്ടകത്തിലാണ് ബ്ലാസ്റ്റേഴ്സിന് അടുത്ത മല്സരം. നിര്ണായക സമയങ്ങളില് ടീമിനെ പ്രതിസന്ധിയിലാക്കുന്ന വിധത്തിലുള്ള രാഹുലിന്റെ അനാവശ്യ ഫൗളുകള് ഈ സീസണില് പലതവണ കണ്ടിരുന്നു.
കൊച്ചിയില് കളിക്കുമ്പോള് പലപ്പോഴും അമിത ആവേശത്തില് കളിക്കുന്ന രാഹുല് എതിരാളികളെ അനാവശ്യമായി ഫൗള് ചെയ്യുന്നതും അതുവഴി മഞ്ഞക്കാര്ഡ് വാങ്ങുന്നതും ഈ സീസണിലെ നിത്യസംഭവമായി മാറിയിട്ടുണ്ട്.
കോച്ച് ഇവാന് വുക്കുമനോവിച്ച് പലവട്ടം രാഹുലിന് ടീം മീറ്റിംഗില് ഇക്കാര്യത്തില് മുന്നറിയിപ്പ് നല്കിയിരുന്നു. വുക്കുമനോവിച്ച് ടീമിനെ പരിശീലിപ്പിക്കാന് എത്തിയതു മുതല് രാഹുല് അദേഹത്തിന്റെ പ്രിയ ശിഷ്യരില് ഒരാളാണ്. എന്നാല് അനാവശ്യമായി ടീമിനെ പ്രതിസന്ധിയിലാക്കുന്ന രീതി വുക്കുമനോവിച്ചിനെയും സന്തോഷിപ്പിക്കില്ല.