അങ്ങനെ അയാള്‍ പൂര്‍ണനായിരിക്കുന്നു. ഫിഫ ലോകകപ്പിലും കിരീടം ചൂടിയതോടെ ലയണല്‍ മെസിയെ വിശേഷിപ്പിക്കാന്‍ ഏറ്റവും ലളിതമായ വിശേഷണം അതായിരിക്കും. ലോകകപ്പ് കൂടി നേടിയതോടെ ചാമ്പ്യന്‍സ് ലീഗും ബാലണ്‍ ഡിയോറും ഒപ്പം നേടിയ കളിക്കാരുടെ പട്ടികയിലെ ഒന്‍പതാമനായി മെസി മാറി.
ബോബി ചാള്‍ട്ടനാണ് ഈ നേട്ടം കൈവരിക്കുന്ന ആദ്യ താരം. മെസിക്ക് മുമ്പ് അവസാനമായി ഈ നേട്ടം സ്വന്തമാക്കിയ താരം ബ്രസീലിന്റെ കക്കയാണ്. 2007 ല്‍ ബാലണ്‍ ഡിയോര്‍ നേടിയ കക്ക ഇതിനു മുമ്പ് എസി മിലാനൊപ്പം ചാമ്പ്യന്‍സ് ലീഗ് സ്വന്തമാക്കിയിരുന്നു.
ഈ മൂന്ന് നേട്ടവും ഒന്നിച്ച് സ്വന്തമാക്കിയ താരങ്ങള്‍ ഇവരാണ്- ബോബി ചാള്‍ട്ടന്‍, ഫ്രാന്‍സ് ബെക്കന്‍ബേവര്‍, ജെറാള്‍ഡ് മുള്ളര്‍, പൗളോ റോസി, സിനദീന്‍ സിദാന്‍, റിവാള്‍ഡോ, റൊണാള്‍ഡീഞ്ഞോ, കക്ക, മെസി. ലോകകപ്പ് നേട്ടത്തോടെ മെസിയുടെ കരിയറില്‍ ഇനി നേടാന്‍ പ്രധാന കിരീടങ്ങളൊന്നുമില്ല.
