ഒരൊറ്റ ദിവസം മണിക്കൂറുകളുടെ ഇടവേളയില്‍ കേരള ബ്ലാസ്റ്റേഴ്സിന്റെ വിവിധ ടീമുകള്‍ ജയിച്ചത് മൂന്ന് മല്‍സരം. അതിലൊരെണ്ണം കിരീട നേട്ടം കൂടിയായിരുന്നു. അണ്ടര്‍ 18 വിഭാഗം എറണാകുളം ജില്ലാ ലീഗിലാണ് ബ്ലാസ്റ്റേഴ്‌സ് കൗമാരപ്പട കിരീടം ചൂടിയത്. ശക്തരായ മുത്തൂറ്റ് ഫുട്‌ബോള്‍ അക്കാഡമിയെ 3-2 നായിരുന്നു ഫൈനലില്‍ വീഴ്ത്തിയത്.
കേരള പ്രീമിയര്‍ ലീഗിന്റെ യോഗ്യത റൗണ്ടിലായിരുന്നു അടുത്ത ജയം. ബ്ലാസ്റ്റേഴ്സിന്റെ റിസര്‍വ് ടീമിനു മുന്നില്‍ അടിതെറ്റിയത് തൃശൂര്‍ സേക്രട്ട് ഹാര്‍ട്ട് കോളജായിരുന്നു. 1-0ത്തിനായിരുന്നു വിജയം. ഇഞ്ചുറി ടൈമില്‍ അല്‍കേഷ് നല്‍കിയ പാസില്‍ അജ്‌സലാണ് വിജയഗോള്‍ കുറിച്ചത്.
സീനിയര്‍ ടീമായിരുന്നു ദിനത്തിലെ അവസാന ജയം കുറിച്ചത്. ബ്ലാസ്റ്റേഴ്സിന്റെ വീടായ കലൂര്‍ നെഹ്‌റു സ്‌റ്റേഡിയത്തില്‍ റൗണ്ട് ഗ്ലാസ് പഞ്ചാബിനെയാണ് തോല്‍പ്പിച്ചത്. ശക്തമായ മല്‍സരത്തിനൊടുവില്‍ വിജയം 2-1ന്. രാഹുല്‍ കെപിയും ദിമിത്രിയോസുമാണ് വലകുലുക്കിയത്. ഈ ജയത്തോടെ സീസണിലെ ബ്ലാസ്റ്റേഴ്സിന്റെ പ്രീസീസണ്‍ മല്‍സരങ്ങള്‍ അവസാനിച്ചു.
