ഐപിഎല്‍ താര ലേലത്തില്‍ മികവുറ്റ പ്രകടനം കാഴ്ചവെച്ച ഒരു ടീമാണ് കൊല്‍ക്കത്ത നൈറ്റ് റൈഡേഴ്സ്. കിരീടവിജയത്തിന് ആവശ്യമായ ഒരുപടി കളിക്കാരെ ലേലത്തിലൂടെ സ്വന്തമാക്കാന്‍ കൊല്‍ക്കത്തയ്ക്ക് സാധിച്ചു. കഴിഞ്ഞ സീസണിലെ ക്യാപ്റ്റന്‍ ഇയോന്‍ മോര്‍ഗനെ കൊല്‍ക്കത്ത തിരിഞ്ഞുനോക്കിയില്ലെങ്കിലും ഒരു യുവതാരത്തിന്റെ വരവ് ആരാധകര്‍ക്ക് ആകാംക്ഷയുണ്ടാക്കുന്നതാണ്.
20 ലക്ഷം രൂപയ്ക്ക് കൊല്‍ക്കത്തയിലെത്തിയ രമേഷ് കുമാറാണ് കൊല്‍ക്കത്തയിലെത്തിയ സര്‍പ്രൈസ് താരം. ലേലത്തിന്റെ രണ്ടാംദിനം ആക്സലറേറ്റഡ് റൗണ്ടില്‍ രമേഷിനെ കെകെആര്‍ നേടി. മറ്റാരും ഈ താരത്തിന് വേണ്ടി രംഗത്തെത്തിയില്ലെന്ന് അതിശയകരമാണ്. ഒരു പ്രാദേശിക ടെന്നീസ് ബോള്‍ ടൂര്‍ണമെന്റില്‍ 10 പന്തില്‍ 50 റണ്‍സടിച്ച ചരിത്രം രമേഷ് കുമാറിനുണ്ട്. ഇതുതന്നെയാണ് താരം കൊല്‍ക്കത്തയുടെ കണ്ണിലുടക്കാന്‍ കാരണമായതും.
ഈ ഇരുപത്തിമൂന്നുകാരന്‍ താരം പ്രൊഫഷണല്‍ ക്രിക്കറ്റിലേക്ക് ഇതുവരെ എത്തിയിട്ടില്ല. പഞ്ചാബിലെ മനാസ സ്വദേശിയാണ്. രമേഷിന്റെ ഒരു വെടിക്കെട്ട് ബാറ്റിങ് വീഡിയോ സോഷ്യല്‍ മീഡിയയിലൂടെ വൈറലായി മാറിയിരുന്നു. ഈ വീഡിയോ കണ്ടാണ് കൊല്‍ക്കത്ത മാനേജ്മെന്റ് രമേഷിനെ ഐപിഎല്‍ ലേലത്തിനെത്തിച്ചത്. ലേലത്തില്‍ ഏറ്റവും കുറഞ്ഞ തുകയായ 20 ലക്ഷത്തിന് ടീമിലെടുക്കുകയും ചെയ്തു.
സിക്സര്‍ മഴ പെയ്യിക്കാന്‍ ഈ വലംകൈയ്യന്‍ ബാറ്റര്‍ക്ക് സാധിക്കും. കൂടാതെ ഇടംകൈയ്യന്‍ സ്പിന്നറുമാണ്. നേരത്തെ കൊല്‍ക്കത്ത താരത്തിനായി ട്രയല്‍സ് നടത്തിയിരുന്നു. ഇതിനുശേഷം ലേലത്തിനായി രജിസ്റ്റര്‍ ചെയ്യിക്കുകയായിരുന്നു. ഐപിഎല്‍ ലേലത്തില്‍ പങ്കെടുത്ത അപൂര്‍വം അമേച്വര്‍ ക്രിക്കറ്റര്‍മാരില്‍ ഒരാള്‍ കൂടിയാണ് രമേഷ്. ടൂര്‍ണമെന്റില്‍ കളിക്കാന്‍ അവസരം ലഭിക്കുകയും കൂടി ചെയ്താല്‍ താരത്തിന്റെ കരിയര്‍ തന്നെ മാറിമറിയും.
താരലേലത്തില്‍ 48 കോടി രൂപയുമായാണ് കെകെആര്‍ എത്തിയത്. ആന്ദ്രെ റസ്സല്‍, വരുണ്‍ ചക്രവര്‍ത്തി, വെങ്കടേഷ് അയ്യര്‍, സുനില്‍ നരേയ്ന്‍ എന്നിവരെ നേരത്തെ നിലനിര്‍ത്തിയിരുന്നു. പാറ്റ് കമ്മിന്‍സ്, നിതീഷ് റാണ, ശിവം മവി, ഷെല്‍ഡന്‍ ജാക്സണ്‍, ശ്രേയസ് അയ്യര്‍ തുടങ്ങിയവരെ നേടുകയും ചെയ്തു. 12.25 കോടി രൂപയ്ക്ക് സ്വന്തമാക്കിയ ശ്രേയസ് ആയിരിക്കും വരും സീസണില്‍ കെകആറിന്റെ ക്യാപ്റ്റന്‍.
