![](https://i0.wp.com/sportsqonlive.com/wp-content/uploads/2022/03/raina.jpg?resize=780%2C470&ssl=1)
ഐപിഎല് മെഗാ ലേലം സമാപിച്ചപ്പോള് ആരാധകരുടെ ഏറ്റവും വലിയ നഷ്ടങ്ങളിലൊന്ന് സുരേഷ് റെയ്നയാണ്. പല കളിക്കാരും വമ്പന് ടീമുകളില് ഇടം നേടിയപ്പോള് മിസ്റ്റര് ഐപിഎല് എന്ന് വിളിപ്പേരുള്ള റെയ്നയെ ടീമുകളൊന്നും പരിഗണിച്ചില്ല. ഇതോടെ 2008 മുതല് ഐപിഎല്ലില് തിളങ്ങിനിന്ന റെയ്നയെ ഇക്കുറി കാണാന് സാധിക്കില്ലെന്നായിരുന്നു ആരാധകരുടെ കണക്കുകൂട്ടല്. എന്നാലിപ്പോള് പുതിയൊരു റോളില് റെയ്ന ടൂര്ണമെന്റിനെത്തുകയാണ്.
ഇക്കുറി പിച്ചിന് പുറത്തായിരിക്കും റെയ്നയുടെ പ്രകടനം. സ്റ്റാര് സ്പോര്ട്സിനുവേണ്ടി റെയ്ന ഹിന്ദി കമന്ററിക്കായാണ് ഐപിഎല്ലില് എത്തുന്നത്. കമന്ററി ബോക്സില് റെയ്നയെ ആരാധകര്ക്ക് കാണാം. മുന് ഇന്ത്യന് പരിശീലകന് രവി ശാസ്ത്രിക്കൊപ്പമായിരിക്കും റെയ്നയുടെ അരങ്ങേറ്റം. ഇന്ത്യന് പരിശീലകനായിരുന്ന ശാസ്ത്രി വീണ്ടും തന്റെ പഴയ തട്ടകമായ കമന്ററി ബോക്സിലേക്ക് തിരിച്ചെത്തുകയാണ്.
ഇംഗ്ലീഷ് കമന്ററിയില് മിന്നിത്തിളങ്ങിയിരുന്ന വ്യക്തിയാണ് രവി ശാസ്ത്രി. എന്നാല്, ഇത്തവണ ശാസ്ത്രി ഹിന്ദി കമന്ററിയിലേക്കാണ് മാറിയത്. ഐപിഎല്ലില് പുതിയ സീസണില് കളിക്കാത്ത റെയ്നയെ ടൂര്ണമെന്റുമായി ബന്ധിപ്പിക്കാനാണ് ഇപ്പോഴത്തെ നീക്കം. റെയ്നയ്ക്ക് വമ്പന് ആരാധകരുടെ പിന്തുണയുണ്ട്. റെയ്നയുടെ ആരാധകവൃന്ദത്തെ ആകര്ഷിക്കാന് സ്റ്റാര് സ്പോര്ട്സിന് സാധിക്കും.