ഇന്ത്യന്‍ പ്രീമിയര്‍ ലീഗില്‍ താരലേലം നടക്കാനിരിക്കേ എല്ലാവരും ആവേശത്തിലാണ്. പല വിദേശതാരങ്ങളും ഐപിഎല്‍ കരാര്‍ ലഭിച്ചാല്‍ കരിയര്‍ രക്ഷപ്പെട്ടുവെന്ന് ചിന്തിക്കുന്നവരാണ്. ഇത്തവണ ലീഗില്‍ കോടീശ്വരനായി മാറാന്‍ സാധ്യതയുള്ള ഒരു താരം വിന്‍ഡീസ് ഓള്‍റൗണ്ടര്‍ റെമാരിയോ ഷെപ്പേര്‍ഡ് ആണ്. വിന്‍ഡീസിനായി ഏകദിനങ്ങളിലും ട്വന്റി-20യിലും തകര്‍പ്പന്‍ പ്രകടനമാണ് ഈ യുവതാരം നടത്തുന്നത്. അതുകൊണ്ട് തന്നെ ഈ ഓള്‍റൗണ്ടര്‍ക്കായി ഫ്രാഞ്ചൈസികള്‍ ലേലത്തില്‍ ഏതറ്റം വരെയും പോകും.
135-145 കിലോമീറ്റര്‍ വേഗത്തില്‍ സ്ഥിരമായി പന്തെറിയാനും മധ്യനിരയില്‍ കൂറ്റനടികള്‍ നടത്താനും ശേഷിയുള്ള താരമാണ് ഷെപ്പേര്‍ഡ്. ഒറ്റയ്ക്ക് കളി ജയിപ്പിക്കാനുള്ള കഴിവുണ്ട്. വിന്‍ഡീസ് ഈ താരത്തെ ഇതുവരെ വേണ്ടവിധത്തില്‍ ഉപയോഗിച്ചിട്ടില്ലെന്നതാണ് വാസ്തവം. താരലേലത്തില്‍ പത്തുകോടിക്ക് മുകളിലുള്ള വില ഷെപ്പേര്‍ഡിന് കിട്ടുമെന്നുറപ്പാണ്.
