Cricket

കൊല്‍ക്കത്തയെ ജയിപ്പിച്ചത് അംപയര്‍ ? സിക്‌സടിച്ച പന്ത് ഫോറെന്ന് വിധിയെഴുതി; വീണ്ടും വിവാദം

ഐപിഎല്ലില്‍ കൊല്‍ക്കത്ത നൈറ്റ് റൈഡേഴ്‌സ്-റോയല്‍ ചലഞ്ചേഴ്‌സ് ബംഗളൂരു മത്സരത്തെച്ചൊല്ലിയുള്ള വിവാദം മുറുകുന്നു.

നേരത്തെ കോഹ് ലിയുടെ വിവാദ പുറത്താകലായിരുന്നു ചര്‍ച്ചാവിഷയമെങ്കില്‍ ഇപ്പോഴിതാ ബംഗളൂരുവിന് അര്‍ഹിച്ച സിക്‌സ് അംപയര്‍ നിഷേധിച്ചതായാണ് ആരോപണം.

മത്സരത്തില്‍ ഒരു റണ്‍സിന് ആര്‍സിബി തോറ്റതിന് പിന്നാലെ ആ സിക്‌സ് അനുവദിച്ചിരുന്നെങ്കില്‍ ആര്‍സിബി ജയിച്ചേനെ എന്ന ആരോപണവുമായി ആരാധകനാണ് രംഗത്തെത്തിയത്.

വരുണ്‍ ചക്രവര്‍ത്തി എറിഞ്ഞ പതിനെട്ടാം ഓവറിലെ അഞ്ചാം പന്തില്‍ സുയാഷ് പ്രഭുദേശായി ഫൈന്‍ ലെഗിലേക്ക് ഉയര്‍ത്തിയടിച്ച പന്തില്‍ അംപയര്‍ ഫോറാണ് അനുവദിച്ചതെങ്കിലും അത് യഥാര്‍ത്ഥതത്തില്‍ സിക്‌സ് ആയിരുന്നുവെന്നാണ് അള്‍ട്രാ സ്ലോ മോഷന്‍ വീഡിയോ സഹിതം ആരാധകര്‍ ആരോപിക്കുന്നത്.

അത് സിക്‌സ് ആണോ ഫോര്‍ ആണോ എന്ന കാര്യത്തില്‍ സംശയമുണ്ടായതോടെ ഫീല്‍ഡ് അംപയര്‍ തേര്‍ഡ് അംപയറുടെ സഹായം തേടിയെങ്കിലും ഒരു തവണ വീഡിയോ പരിശോധിച്ചശേഷം തേര്‍ഡ് അംപയര്‍ അത് ഫോറാണെന്ന് വിധിയെഴുതുകയായിരുന്നു.


മുമ്പൊക്കെ വിശദമായ പരിശോധനയ്ക്കു ശേഷമാണ് വിധി പറഞ്ഞിരുന്നതെങ്കില്‍ ഇത്തവണ വളരെപ്പെട്ടെന്നായിരുന്നു
തേര്‍ഡ് അമ്പയറുടെ തീരുമാനം.

പ്രഭുദേശായിയുടെ പന്ത് ബൗണ്ടറി കടന്നതിനു പിന്നാലെ കമന്റേറ്റര്‍മാര്‍ അത് സിക്‌സ് ആണെന്ന് പറഞ്ഞിരുന്നെങ്കിലും പിന്നീട് അമ്പയര്‍ അത് ഫോറാണെന്ന് വിധിച്ചതോടെ അവരും പിന്നീട് നിലപാട് മാറ്റി.

എന്നാല്‍ ആരാധകരുടെ ആരോപണത്തെക്കുറിച്ച് ഐപിഎല്‍ ഇതുവരെ ഔദ്യോഗികമായി പ്രതികരിച്ചിട്ടില്ല.

മത്സരത്തില്‍ ആദ്യം ബാറ്റ് ചെയ്ത കൊല്‍ക്കത്ത 20 ഓവറില്‍ ആറ് വിക്കറ്റ് നഷ്ടത്തില്‍ 222 റണ്‍സെടുത്തിരുന്നു. 223 റണ്‍സ് വിജയലക്ഷ്യം പിന്തുടര്‍ന്ന ആര്‍സിബിക്ക് മിച്ചല്‍ സ്റ്റാര്‍ക്ക് എറിഞ്ഞ അവസാന ഓവറില്‍ 21 റണ്‍സായിരുന്നു ജയിക്കാന്‍ വേണ്ടിയിരുന്നത്.

അവസാന ബാറ്റര്‍മാരായ കാണ്‍ ശര്‍മയും മുഹമ്മദ് സിറാജുമായിരുന്നു ക്രീസില്‍. തോല്‍വി ഉറപ്പിച്ചിരുന്ന ആറ്‌സിബിക്കായി കാണ്‍ ശര്‍മ മിച്ചല്‍ സ്റ്റാര്‍ക്കിനെതിരെ മൂന്ന് സിക്‌സുകള്‍ നേടിയതോടെയാണ് ആര്‍സിബി വിജയം മണത്തിരുന്നു.

രണ്ടു പന്തില്‍ മൂന്നു റണ്‍സ് വേണമെന്നിരിക്കെ അഞ്ചാം പന്തില്‍ കാണ്‍ ശര്‍മ പുറത്താകുകയും അവസാന പന്തില്‍ ലോക്കി ഫെര്‍ഗൂസന്‍ ഡബിളിന് ശ്രമിക്കവെ റണ്ണൗട്ടാവുകയും ചെയ്തതോടെയാണ് ആര്‍സിബി ഒരു റണ്ണിന് മത്സരം കൈവിട്ടത്.

Related Articles

Back to top button